Casa de madeira de Lucas, Telmo e Nuno
Recibimos a encarga dunha casa de madeira para unha familia grande con varias premisas: queren materiais naturais, sostibles, nunha vivenda con moita luz, ampla e práctica.
Gustaríalles que estivese moi conectada co exterior polo que será unha casa con moito cristal e con ventás-portas que permitan sair ao xardín desde todas as estancias.
Trátase dunha construcción en madeira, con unha estructura de madeira laminada e un forxado tamén de madeira na planta superior.
O forxado da planta baixa, porén, é de formigón posto que, deste xeito, permite que se poida colocar un sistema de calefacción con chan radiante e aerotermia.
A fachada é ventilada, de madeira de piñeiro.
A parte central da vivenda é o salón-cociña, presidido por unha illa de pedra e unha mesa da mesma madeira que unha parte da estructura da vivenda. A doble altura do salón aporta un extra de luminosidade e amplitude. O altillo constitúe un espazo versátil e multiusos, con saída á cuberta transitable.
A zona nocturna da vivenda está composta por unha habitación infantil transformable e outra principal en suite.
A habitación dos nenos é moi ampla, cun espazo de xogos e unha zona de dormitorio con tres camas e unha litera para as convidadas sen ningún tipo de separación. Hai tres portas e tres ventás que permitirán, no futuro, dividila, se fose preciso, en tres habitacións.
O dormitorio principal está en suite co seu baño e, coma o resto de estancias, está conectado co exterior con grandes ventanais e moita luz.
Os armarios están no corredor, son de obra, con gran capacidade de almacenaxe.
